మోడీ పుట్టిన రోజు ఆ కుటుంబాలకు దీపావళి

రాజకీయ నాయకుల పుట్టినరోజులు సాధారణంగా పార్టీ కార్యకర్తలు, మద్దతుదారులు తమ అంకితభావాన్ని, అభిమానాన్ని చాటుకునే సందర్భాలుగా ఉంటాయి. ఈ రోజు తమ సంస్థకు, మద్దతుదారులకు ఒక ప్రత్యేకమైన రాజకీయ గుర్తింపు తెచ్చిపెట్టారని భావించే నాయకుడిని పార్టీ శ్రేణులు వేడుకగా కొనియాడే అవకాశం. మరికొందరికి, తాము మద్దతు ఇచ్చే లేదా అభిమానించే నాయకుడిని అభినందించే ఒక సాధారణ సందర్భం.

కానీ ఉత్తరప్రదేశ్‌లోని ప్రయాగ్‌రాజ్‌లో మోడీ పుట్టిన రోజైన సెప్టెంబర్ 17ను కాస్త వినూత్న రీతిలో జరుపుకుంటున్నారు.

లూకర్‌గంజ్‌లోని 76 పేద కుటుంబాల కోసం నిర్మించిన ఒక హౌసింగ్ కాంప్లెక్స్ నివాసితులు ప్రధానమంత్రి నరేంద్ర మోదీ పుట్టినరోజును ప్రమిదలు వెలిగించి, రంగురంగుల విద్యుత్ దీపాలతో తమ ఇళ్లను అలంకరించి వేడుకగా జరుపుకోవాలని నిర్ణయించుకున్నారు. ఇది ఈ సందర్భానికి ఒక చిన్నపాటి దీపావళి శోభను సంతరించిపెట్టింది.

ఇలా పండుగ చేసుకోవడానికి వారి చాలా స్పష్టమైన కారణం ఉంది. వారికిప్పుడు సొంతిళ్లు ఉన్నాయి.

గ్యాంగ్‌స్టర్‌గా మారి రాజకీయాల్లోకి వచ్చిన అతిక్ అహ్మద్ అక్రమ ఆక్రమణలో ఉన్నట్లు అధికారులు గుర్తించిన భూమిని ఉత్తరప్రదేశ్ ప్రభుత్వం స్వాధీనం చేసుకున్న తర్వాత, ఈ 76 కుటుంబాలకు ‘ప్రధానమంత్రి ఆవాస్ యోజన’ కింద శాశ్వత గృహాలను అందించారు.

సురక్షితమైన ఇల్లు లేక ఏళ్లుగా నివాసాల కోసం అల్లాడిపోయిన కుటుంబాలకు, ఈ ఫ్లాట్ల నిర్మాణం వారి జీవితాల్లో ఒక గణనీయమైన మార్పును తెచ్చింది. మోదీ పుట్టినరోజును దీపావళి తరహాలో జరుపుకోవాలనే ఈ నిర్ణయాన్ని లబ్ధిదారులు వ్యక్తం చేస్తున్న కృతజ్ఞతా భావంగా స్థానిక బిజెపి నాయకులు అభివర్ణిస్తున్నారు.

ఒక భిన్నమైన చరిత్ర

ఉత్తరప్రదేశ్‌లో చెప్పుకోదగ్గ రాజకీయ దృష్టిని ఆకర్షించిన చరిత్ర ఈ స్థలానికి ఉంది. ఒకప్పుడు అతిక్ అహ్మద్ ప్రయాగ్‌రాజ్‌లో అత్యంత శక్తివంతమైన, వివాదాస్పద వ్యక్తులలో ఒకరు. ఆయన అనేక నేరపూరిత కేసులను ఎదుర్కొంటూనే, శాసనసభ్యుడిగా (ఎమ్మెల్యే), పార్లమెంట్ సభ్యుడిగా (ఎమ్‌పి) పనిచేశారు. కొన్ని దశాబ్దాల పాటు, ఆయన పేరు నగరం యొక్క అండర్‌వర్ల్డ్‌తో, రాజకీయ సంబంధాలతో ముడిపడి ఉంది.

తీవ్రమైన నేరారోపణలు ఎదుర్కొంటున్న వ్యక్తులకు చెందిన అక్రమ ఆస్తులపై ఉత్తరప్రదేశ్ ప్రభుత్వం చేపట్టిన విస్తృత చర్యల్లో భాగంగా, అతిక్ అహ్మద్ తో సంబంధం ఉన్నట్లు ఆరోపణలు వచ్చిన ఆస్తులపై ప్రభుత్వం చర్యలు తీసుకుంది.

ఆ తర్వాత లూకర్‌గంజ్ ఆస్తి ప్రజా ప్రయోజనాలకు ఉపయోగపడింది.  ప్రభుత్వం దాన్ని పేద కుటుంబాల నివాస స్థలంగా అభివృద్ధి చేసింది.

అర్హులైన కుటుంబాలకు శాశ్వత ఇళ్లను అందించే లక్ష్యంతో కేంద్ర ప్రభుత్వం చేపట్టిన ప్రతిష్టాత్మక హౌసింగ్ ప్రోగ్రామ్ ‘ప్రధానమంత్రి ఆవాస్ యోజన’ కింద ఈ ఫ్లాట్లను నిర్మించారు. లబ్ధిదారులకు ఈ మార్పు కేవలం మాటలకే పరిమితం కాకుండా ప్రత్యక్షంగా అనుభవంలోకి వచ్చింది.

ఒక ఉండడం అంటే వాతావరణ పరిస్థితుల నుండి రక్షణ, పిల్లలకు మెరుగైన భద్రత, ఒక స్థిరమైన చిరునామా కలిగి ఉండడం. ఇది చాలామందికి ఒక కల. గతంలో సరిపడా వసతులు లేని లేదా తాత్కాలిక నివాసాలలో నివసించిన కుటుంబాలకు ఇది చాలా పెద్ద వరం.

అతిక్ అహ్మద్ హత్య

అతిక్ అహ్మద్ బలవంతంగా తన ఆధీనంలో ఉంచుకున్న ఆస్తులల్లో ఇది కూడా ఒకటి.

ఏప్రిల్ 15, 2023న ప్రయాగ్‌రాజ్‌లో వైద్య పరీక్షల కోసం పోలీసులు ఆసుపత్రికి తీసుకెళ్తుండగా అతిక్ అహ్మద్, ఆయన సోదరుడు అష్రఫ్ అహ్మద్‌లను ముగ్గురు వ్యక్తులు కాల్చి చంపారు.

ఈ హత్యలకు సంబంధించి లవ్లేష్ తివారీ, సన్నీ సింగ్, అరుణ్ మౌర్య అనే ముగ్గురూ హత్య తరువాత పోలీసులకు లొంగిపోయారు. దాడి చేసిన వారు విలేకరులుగా నటించి సోదరులపై దగ్గరి నుండి కాల్పులు జరిపారు. పోలీసు సిబ్బంది, విలేకరుల ఎదుటే ఈ సంఘటన జరగగా, అది టెలివిజన్ కెమెరాల్లో రికార్డైంది. ఈ ఘటనకు దారితీసిన పరిస్థితులను విచారించేందుకు రాష్ట్ర ప్రభుత్వం ఒక జ్యూడీషియల్ కమిషన్‌ను ఏర్పాటు చేసింది.

అతిక్ అహ్మద్‌కు సంబంధించిన అరాచక ప్రభావం అంతమొందడాన్ని కొందరు స్వాగతించగా, మరికొందరు ఈ హత్యలు జరిగిన తీరును ఖండించారు. ఏఐఎంఐఎం (AIMIM) అధ్యక్షుడు, హైదరాబాద్ ఎంపీ అసదుద్దీన్ ఒవైసీ ఈ హత్యలను వేడుకగా చేసుకున్న వారిని విమర్శించారు.

సెప్టెంబర్ 17నే ఎందుకు పండుగ?

ప్రయాగ్‌రాజ్ వెస్ట్ ప్రాతినిధ్యం వహిస్తున్న బిజెపి ఎమ్మెల్యే సిద్ధార్థ్ నాథ్ సింగ్ మాట్లాడుతూ దీపాలు వెలిగించి మోదీ పుట్టినరోజును జరుపుకోవాలనే ఆలోచనతో స్థానికులే తనను కలుసుకున్నారని చెప్పారు.

లబ్ధిదారులు ఈ సందర్భాన్ని తమదైన రీతిలో గుర్తుండిపోయేలా చేయాలనుకున్నారు. స్థానిక బిజెపి నాయకత్వం దీపాలు, మిఠాయిలు ఏర్పాటు చేసింది. ప్రభుత్వ గృహనిర్మాణ కార్యక్రమం ఆర్థికంగా బలహీనవర్గాలకు ఎలా లబ్ధి చేకూరుస్తుందో తెలిపే ఒక ఉదాహరణగా ఈ కార్యక్రమాన్ని ప్రచారం చేస్తున్నారు.

ముఖ్యంగా అతిక్ అహ్మద్‌తో ముడిపడి ఉన్న భూమిపై ఈ ఇళ్లు నిర్మించబడటంతో దీనికి రాజకీయ ప్రాముఖ్యత వచ్చింది. గతంలో ఏ ప్రభుత్వం కూడా అతిక్ అహ్మద్ ను కన్నెత్తి చూడడానికి భయపడేది. అటువంటిది ముఖ్యమంత్రి యోగి నాయకత్వంలోని ప్రభుత్వం అతడిని అరెస్ట్ చేసింది. ఆసుపత్రికి తీసుకు వెడుతున్న సందర్భంలో అతడిని దుండగులు కాల్చి చంపారు.  నేరపూరిత వ్యక్తులు అక్రమంగా సంపాదించిన లేదా ఆక్రమించిన ఆస్తులపై తీసుకున్న చర్యలకు ఇది ఒక నిదర్శనంగా, శాంతిభద్రతల పరిరక్షణ చర్యలలోయ భాగంగా దీనిని పరిగణించాలి.

అదే సమయంలో, ఈ గృహనిర్మాణ ప్రాజెక్ట్ చాలా పెద్ద ప్రభుత్వ సంక్షేమ కార్యక్రమంలో ఒక భాగం. అర్హులైన కుటుంబాలకు గృహ నిర్మాణ సహాయం అందించడానికి దేశవ్యాప్తంగా ప్రధానమంత్రి ఆవాస్ యోజనను అమలు చేస్తున్నారు.

ప్రయాగ్‌రాజ్ ‘దీపావళి’ ప్రత్యేకత ఏమిటంటే ఇది సాధారణ రాజకీయ పుట్టినరోజు వేడుకల స్థాయిని దాటి వ్యక్తిగతమైన అభిమానాన్ని వ్యక్తీకరించే స్థాయికి చేరింది. వారికి శాశ్వత చిరునామా లభించడమే అందుకు కారణం. ఆ ఇళ్లలోనే వేడుకలు జరుపుకోవడం ద్వారా ప్రధానమంత్రి పుట్టినరోజును జరుపుకుంటున్నారు

రాజకీయ విమర్శలతో సంబంధం లేకుండా, లూకర్‌గంజ్‌లో తక్షణమే కనిపిస్తున్న మార్పు మాత్రం 76 కొత్త ఇళ్ల రూపంలో స్పష్టంగా ఉంది.

• ఆర్‌. అవధాని